Иахьа аҵыхәтәантәи имҩахь днаскьаргеит абаҩрҵәыреи аспорти рзы Аҳәынҭқарратә еилакы ҧасатәи аиҳабы, аҽыбӷаҟазаратә спорт азы жәларбжьаратәи акатегориа змаз аӡбаҩ Валери Чынчор-иҧа Барцыц.
Валери Чынчор-иҧа Барцыц иҧсҭазаара далҵит 78 ш. дшырҭагылаз, апрель 6 рзы.
Гәдоуҭатәи акультуратә хан аҟны аҵыхәтәантәи абзиараз ҳәа иарҳәеит Валери Барцыц иқәлацәа, ауаажәларра, акыр шықәса иџьабаа здиҵахьаз аспорт иадҳәалоу ауаа, аиҳабыра рхаҭарнакцәа.
Аҳәынҭқарратә усзуҩы аҵыхәтәантәи имҩахь инаскьагаразы еиҿкааз аҳәынҭқарратә комиссиа аиҳабы, аҧыза-министр ихаҭыҧуаҩ Асҭамыр Қьецба алахьеиқәҵаратә митинг аартуа иазгәеиҭеит Валери Барцыц иуаҩышьа, Аҧсны аспорт аҿиаразы иџьабаа ду.
«Валери Чынчор-иҧа Барцыц иҩызара пату рзақәын. Ауаа рҳаны иман. Урҭ иара ишҟа иаадырҧшуан ауаҩра, абзиабара, аҳаҭырқәҵара. Иара иман аҩныҵҟатәи акультура ду, хаҭалатәи аамсҭашәара.Еснагьы ихы-иҿы алрашон хашҭра зқәым иччаҧшь лаша. Дыздыруаз зегьы иазгәарҭон ихшыҩ аҵарра. Акреилызкаауаз, агәамч ду змаз уаҩытәыҩсан,убри азакәын иара имҽхакгьы зыҭбааз, иаҳаҭыргьы зыӷәӷәаз ауаа рҿы. Валери Чынчор-иҧа дыҟан, дагьаанхоит хашҭра иқәымкәа, избанзар, ихылҵуан алашара, ақьиара, аҧхарра», - иҳәеит Асҭамыр Қьецба.
Аҧсны аолимпиатә комитет апрезидент Валери Аршба иазгәеиҭеит Валери Барцыц шиакә 2001 ш. рзы аолимпиатә комитет аиҿкаара зыбзоуроу. Иҳәеит Валери Чынчор-иҧа иҩызцәа рзы рыҧсадгьыл амаҵ азура зегь реиҳа ишхадаз.
«Иара иарбан усзаалакгьы дызҿыз, аиҳабыра ибзиан иныҟәигон. Аус ахьиуазаалакгьы Валери Чынчор-иҧа иколлектив пату иқәырҵон. Аибашьра ашықәсқәа раан иара ибзоурала Аҧсны аспортсменцәеи аспорт аусзуҩцәеи СССР Аспорткомитет ахьӡала агуманитартә цхыраара роуртә еиҧш иҟаиҵеит. Иара зегь реиҳа аспорт аҿы аквалификациа змаз, апрофесиионализм злаз уаҩын. Ихьанҭаз аибашьра ашьҭахь Аспорткомитет дахагылан. Иара ибзоурала еиуеиҧшыммыз аицлабрақәа мҩаҧыргон. Иара дуаҩ қьиан, интеллигентын, игәы аартын. Иҳаракыз, пату змаз уаҩын», - ҳәа азгәеиҭеит Валери Аршба.
Аҧсны абаҩрҵәыреи аспорти рзы Аҳәынҭқарратә еилакы аиҳабы Баграт Хәытаба иҳәеит амҩа иқәызҵоз аиҳабы иахьа дахьырцәыӡыз акыр ргәы ишалоу. Иазгәеиҭеит адунеижәларбжьаратәи акатегориа змоу ӡбаҩыс Аҧснынтәи Валери Чынчор-иҧа Барцыц заҵәык шиакәыз иҳамаз.
«Аус ахшыҩ ҵаулала иазхәыцуаз иакәын. Аус ахьиуазаалакгьы аҳаҭыри патуи змаз иакәын. Аспорт азҿлымҳара ӷәӷәала иман. Аҧсны аибашьра ашьҭахь ауадаҩрақәа иҟаз ижәдыруа ауп. Аспорт ҳацхраап ҳәа иҩызцәа ҧхьагылаҩыс дрыман, имаҷымкуа аус бзиақәа ҟаицеит абаҩрҵәыреи аспорти рырҿиаразы. Ауадаҩра аамҭақәа аныҟаз Аҧсны уаанӡатәи аиҳабыра изныкымкәа иреиҳәон аспорт ацхыраара шаҭаху. Иахьа уажәраанӡа Валери Чынчор-иҧа иҟаиҵаз аусмҩаҧгатәқәа аҳәынҭқарратә еилак аҿы ҳхы иаҳархәоит. Дуаҩы цкьан, дуаҩы ӷәӷәан, иҧсадгьыл игәы азыбылуан. Гәыкала иус дазнеиуан, ишәычҳа, зегьы бзиахоит ҳәа ҳаиҳәон есымша. Ауаҩҧсы хазына, аҧсуа хаҵа, ҳаиҳабацәа рашьа, рҩыза иакәын», - иҳәеит Баграт Хәытаба.
Валери Барцыц иҩыза Виачеслав Цыгәба иҳәеит спортсменк иаҳасабала Валери Барцыц аҭыҧ дуқәа аанимкылазаргьы, аспорт аҿиараҿы, аиҿкаараҿы илагала шдуу.
«Дахьыҟазаалакгьы ахаҭарнакра бзиа ҟаиҵон, ҟазшьалагьы дыџьбаран, аиаша иҭахын, зегьынџьара иашарыла иусқәа дрызнеиуан», - иҳәеит Виачеслав Цыгәба.
Иара Валери Барцыц иҭынхаз иҧа иӡӷабцәа ҩыџьа ақәҿиарақәа рзеиӷьеишьеит.
Валери Барцыц анышә дамардеит ақыҭа Блабырхәа.