Авторизация:

Аҧсны Аконституциа иахыҵуеит 25 шықәса

Аҧсны Аконституциа иахыҵуеит 25 шықәса
25 ноября 2019 13:38 886
Апсадгьыл-инфо, 25 ноября 2019 г.  

Ноиабр 26 - Аҧсны Аконституциа иамшуп. 1994 шықәса рзы, ари амш аҽны, иреиҳаӡоу Асовет аилатәараҿы ирыдыркылеит ихьыҧшыму, идемократиатәу, изинтәу Аҧсны Аконституциа ҿыц. Иара убасҟан далхын аҳәынҭқарра раҧхьатәи Ахада Владислав Арӡынба. Уи аахыс иҵит 25 шықәса.

«Ахьтәы парламент» ҳәа изышьҭаз, Жәлар реизара раҧхьатәи ааҧхьара адепутат, уи ҩынтә спикерс иамаз, ауаажәларратә палата алахәыла, Ахьӡ-аҧша аорден аҩбатәи аҩаӡара занашьоу, ари Аконституциа хатала аус адызулоз, ҳтәылаҿы зыхьӡ нагоу ауаажәларра-аполитикатә усзуҩы Сократ Џьынџьал урҭ аамҭақәа игәалашәарақәа рҿы дырзыгьежьуа иазгәаиҭоит акыр ишгәаӷьыуацәаз ас еиҧш аҭакҧхықәра ахахьы агара.


Аибашьра зхызгаз, зхьыҧшымра зынӡа иқәыҧшӡаз Аҧсны Аконституциа адкылара азырхиара ус имариамызт. Аҳәаанырцәтәи аҳәынҭқаррақәа жәпакы еиҳаракгьы изыцклаҧшуаз Аҧсны Қырҭтәыла аганахь имҩаҧнагоз аполитика акәын. Усҟантәи аамҭазы Урыстәылатәи Афедерациа ҳтәыла аганахь имҩаҧнагоз аполитикала, ҳҳәынҭқарра ахьыҧшымра мышкызны иазхаҵахоит ҳәа агәрагара уадаҩын.

Убри аҟынтә, зхьыҧшымра ҿыцыз, идемакратиатәыз Аҧсны иаҭахын аҳәынҭқарра аргыларазы ихымҧадатәу азинтә шьаҭа. Уи азыҳәан еиқәыршәатәын азинхадақәа еидызкылоз ашәҟәы - Аконституциа. Иара аҧҵаразы еиҿкааз акомиссиа напгхара аиҭон Аҧсны Иреиҳаӡоу Асовет ахантәаҩы Владислав Арӡынба.

Аконституциа аиқәыршәара аус адызулоз, аконституциатә комиссиа иалахәыз зегьы ирныруан ари азакәанқәа реизга адкылара алмыршаразы адәныҟатәи амчқәа иҟарҵоз ақәымчра. Урыстәыла аҳҭнықалақь аҟынтәи акомиссиа ахаҭарнакцәа изныкымкәа ирзаарыцҳахьан изҿу иакәыцырц азы.


Аконституциа анрыдыркылоз, ноиабр 26 1994 шықәса рзы Жәлар реизара адепутатцәа иахьынӡауаз ала ирмаӡаны еизеит. Аха ус шакәызгьы, Аҧсны Иреиҳаӡоу Асовет ахантәаҩы Владислав Арӡынба аизара аҟынтәи изныкымкәа-иҩынтәымкәа ддәылыргеит ҭелла иацәажәарцазы. Аҳәаанырцәынтәи иасуаз иарҳәоз акы акәын -Аконституциа адкылара мап ацәктәуп, уи адкылара аларшатәым ҳәа.

Ҳәара аҭахума аҧсуа патриотцәа рыгәҭакы ишацәхьамҵыз. Адепутатцәа зегьы еицҿакны ари ашәҟәы адкылара рыбжьы арҭеит. Ари ахҭыс ҭоурыхтә шьаҿахеит Аҧсны азы.

Аҳәынҭқарратә зинқәа реизга аамҭа хьанҭақәа иргәылсны иахьа уажәраанӡа ҳтәыла иашәҟәы хаданы иаанхоит.

Раҧхьатәи Аконституциа авторцәа руаӡәк Сократ Џьынџьал иҳәоит ҳзинқәа реизга хада ареформа азура азҵаара иалацәажәоижьҭеи акыр шааҵуа. Аӡәырҩы ргәаанагарала, уи хымҧада иаҭахуп, аха ари аус ишәаны-изаны иазнеитәуп. Избан акәзар, раҧхьа ишьақәыргылатәуп ахәҭаҷқәа рыҧсахра иашьҭанеиуа азҵаарақәа зегьы рыӡбара ҳахьынӡазыхиоу.




Для того, чтобы оставить свой комментарий, Вам необходимо авторизоваться!
Авторизация:
 
Текст сообщения*
Перетащите файлы
Ничего не найдено
Защита от автоматических сообщений