Аполитикатә партиа «Иаку Аҧсны» аиҳабы Сергеи Шамба иаҧшьгарала аполитикатә партиақәеи ауаажәларратә еиҿкарақәеи рхаҭарнакцәа злахәыз аиҧылара мҩаҧысит. Уаҟа иқәыргылан зҵаарак – Аҧсны ахада ҧхьатәара ицара.
Аҧсадгьыл-инфо, сентиабр 14 2018 ш. Ҳаџьымба ахадараҿы иҟазаара ҳҳәынҭқарра адеградациа амҩа иацнаҵоит. Иҳәеит Сергеи Шамба аиҧылараҿы.
«Убри азы ауп ҳара аоппозициатә мчрақәа рблок зыҟаҳҵаз, ахада иаамҭа аиаанӡагьы ицара заҧшьаҳгаз. Даҽа шықәсык иара ахадараҿы иҟазаара убас аҭагылазаашьа нанагара ауеит, нас уаҳа рҽеишьа амоуа. Иалаҳхран иҟоу ахада ҽыцгьы шаҟа ицәыәцәгьахо еилыскаауеит ари ари ахаос алҵра», - иҳәоит Шамба.
Иара иаҵшьны иазгәеиҭеит убри аан аҳәынҭқарра ахада мчыла иахҳәара мап шацәыркуа.
«Ҳара иаҳҭахуп иара ихала дцарц. 2014 ш. рзы ақәымчра аелемент ыҟан. Иаҳҭахуп уи аҩыза ҟамларц, егьи аган ала апровокациа ҟармҵар. Зегьы рҟынтәи исаҳауеит ари аиҳабыра шырзымычҳауа. Дара идҳарбарц ҳҭахуп ауаа рацәа шаҿагылоу имҩаҧырго акурс», - азгәеиҭеит Сергеи Шамба.
Иара иҳәеит ауаа реиҟәшара Аҧсны Рауль Ҳаџьымба аполитикаҿ данцәырҵ ашьҭахь ишалагаз.
«Аҳәынҭқарра ахада иалхрақәа анымҩаҧааго есымша аибашьра аҟынӡа ҳнеиуеит. Уи ҟалоит, избанзар, Ҳаџьымба есымша алхрақәа рлыҵшәақәа азхаиҵаӡом. Иашоуп, сара аҵыхәтәантәи алхрақәа раан Ҳаџьымба сидгылан. Уаанӡа исҳәаӡомызт, агәыӷра сыман ииҳәоз наигӡоит ҳәа, сара иара сидгылеит Аҧсны аибашьра ҟамларц азы.2014 ш. рзы иҟалаз ашьҭахь, дара амчра руумҭар, алхрақәа ахаан иазхарҵаӡомызт. Ҳаџьымба ахаан алхрақәа рлыҵшәа азхаимҵацызт, иагьрыдимныҳәалацызт иаиааиуаз. Анқәаб данахырҳәа ашьҭахь, иара дмаиааир, Аҧсны аибашьра иҭаиргылон. Сара исгәалашәоит актәи алхрақәа. Усҟан аҭагылазаашьа аҭышәынтәалара алыршахеит Урыстәыла иҟоу Аҧсны аҩызцәа рыбзоурала. Сара аиҿцәажәарақәа рышьҭахь саауан, дысзасит Гиви Допуа, исеиҳәеит Ахақәиҭра ашҭаҿы ҳнеирц. Снеит, уаҟа бџьарла еиқәных Ҳаџьымба идгылоу ауаа гылоуп. Дара Ҳаџьымба ицәгәышуан: ҳара ҳаиҭиит, аиҿцәажәарақәа дрылахәын, уажәы зегьы ҳацҟьоит ҳәа. Уи аҩыза алхрақәа зегьы раан иҟан. Убри азы ауп сара исҳәо сзалагаз, апарламенттә республикахьы ҳаиасыр иаҳа еиӷьуп ҳәа», - иҳәеит аполитик.
Саргеи Шамба иажәақәа рыла, уажәтәи аиқәшәараҿы еизигеит ауаажәлар ргәаанагара шьақәзыргыло еицырдыруа ауаа, урҭ иахьа иҟоу аҭагылазаашьа азы драцәажәарц.
«Аибашьра ашьҭахь Владислав Арӡынбеи Зураб Ачбеи акыр ҳаицәажәон. Зурик игәы иалан иҳәон ақырҭқәа рырҳәра иалагеит ҳәа. Иара иҳәон, иахьа ақырҭқәа дырҳәуеит, уаҵәы – аерманцәа, аурысцәа, нас аҧсуаа рҟынӡа инеиуеит ҳәа. Ус егьыҟалеит. Иалагеит ауаа беиақәа рӷьычра. Иаагозар, Санаиа, уи уиаҟара дбеиам, аха, 200 нызқь рзы дырӷьычуеит. Нас 20 нызқь, 10 нызқь рзы рӷьычра иалагоит. Ауаа рызҽзыршьуеи? Уаҳа ҧсыхәа рымам азы. Аҧсны иҟоу агәҭынчымра узцәырнамгар ауам. Сара избо даара ихьанҭоуп. Сара изныкымкәа исҳәахьеит, убри аҩыза аҭагылазаашьаҿы ҳаҟоуп, аҧхьаҟа иузмырҽеиуа апроцессқәа ҟалар алшоит. Аҳәынҭқарра здыргыло, ауаа ршәарҭадара алыршаразы ауп. Ҳара иахьа иаабои? Ҳала шааҧшуа аӷьычрақәа, ақәыларақәа, ашьрақәа, аҽшьрақәа. Адәныҟатәи ашәарҭадара алыршоуп Урыстәылатиә Афедерациа абзоурала, аха уаҟагьы ҳаизыҟазаашьақәа еицәаҳтәырц ҳаҿуп. Зны-зынла сшанхоит ирыҩуа азы – иқәыргааит ар, апенсиақәа ршәара иаҟәыҵааит, уи ала ҳара рнапаҿы ҳааргеит ҳәа. Исзеилкаауам, ас шҧаҳҳәо, изыхьчода нас ҳҳәаақәа?» - дҵаауеиит Сергеи Шамба.