Иҭыҧ ааныжьразы адокумент инапы анаҵаиҩы ашьҭахь Рауль Ҳаџьымба ажәлар ахь ааҧхьара ҟаиҵеит телехәаҧшрала.
Уаҟа иаҳәоит: «Акыр иаҧсоу ҳауаажәлар!
Ишыжәбо еиҧш, арҭ амшқәа рзы Аҧсны аҭагылазаашьа акырӡа иуадаҩын. Иҟан аимак-аиҿак – ауаажәларратә-политикатә зҵаарақәа рыкәша-мыкәша. Урҭ рзын сара сгәаанагара сҳәон, иагьысҳәоит иаахтны – ҳажәлари ихьыҧшым Аҧсны аҳәынҭқарреи ҧхьаҟатәи рлахьынҵа, рҧеиҧш ҳасаб азуны.
Исылшо зегьы ҟасҵон, иҟасҵоит иҟамларцазы аиҿагылара, избанзар ҳажәлар ирхыргахьеит имаҷымкәа атрагедиақәа, арыцҳарақәа. Ҳара ҳазхәыцроуп ҳҭоурых, ҳазнысыз амҩа, шаҟаҩ рхы ақәырҵаз иахьа иҳамоу ахақәиҭра. Сара сашьҭоуп алхрақәа роума, аҳәынҭқарратә система аиқәырхароума– зегьы азакәани, азини, аконституциеи рымҩала имҩаҧысларц. Даҽа мҩак – ишәарҭоу мҩоуп! Имаҷым иҳалшаз, ҳзыхьӡаз, зегьы шәымчала, ажәлар зегьы рымчала. Ирацәоуп ҳазхьымӡазгьы. Аха сгәанала, агәкажьра аҭахым, аҧсҭазаара ҧхьаҟа ицоит. Иҟалароуп аҭынчра, аилибакаара. Уаҳа ҧсыхәа шыҟам аабароуп зегьы, избанзар ҳазегь жәларык ҳауп, адунеи зегьы рылаҧш ҳхуп.
Иҭабуп ҳәа шәасҳәоит сеилызкааз, исыдгылаз, ҳзеиҧш усқәа рҿы апринципра аазырҧшыз! Иара убас пату сзақәуп досу игәаанагара, амчраҿ дыҟазаргьы, аоппозициаҿы дыҟазаргьы.
Ҳазҭалаз аныҳәамш – ашықәс ҿыц азы ишәзеиҕьасшьоит агәамч, агәалаҟара бзиа!
Анцәа ду илаҧш агымхааит Аҧсны аҵеира ршьала, рфырхаҵарыла иаагоу Ҳаҧсуа ҳәынҭқарра! Сара сыуаажәлар сшәылагылоуп, шәхьаа – схьаауп, шәгәыҕра саргьы исгәыҕроуп! Сыҧсадгьылаҿ сыҟоуп, уи аҧеиҧшазын аринахысгьы исылшо зегьы ҟасҵалоит».