Ареспубликатә политикатә партиа «Аҧсны жәлар ракзаара афорум» аизараҿы дықәгылеит Рауль Ҳаџьымба. Иара дырзааҭгылеит Аҧсны иҟоу аҭагылазаашьа дшахәаҧшуа атәы.
«Исаҳауеит зны-зынла, апрезидент дыҧсыҽуп, сыҧшыцзар, сабашәҭаху, ара сызшәыргылои? Еиӷьу дҳамам, мамзар, даҽакала ҳамныҟәоз ҳәа. Еиӷьу са сацкыс дшәымамзар, башоуп ҳҳәынҭқарра азыҳәа. Еиӷьу дыҟазароуп, еиӷьу дгылароуп. Уи ада ҧсыхәа амаӡам аҧсуа ҳәынҭқарра», - иҳәеит Рауль Ҳаџьымба.
Иара иҳәеит ауаажәлар гәҭыхас ирымоу ибзиан ишидыруа.
«Ибзиан издыруеит шәызегьы гәҭыхас ишәымоу. Ихадароуп акы - зықьҩыла аҵеицәа рхы зқәырҵаз ахьыҧшымра, ауаа реидкылара, аизыразра, аилибакаара, аҳәынҭқарра амчхара ӷәгәахартә еиҧш аусеицура. Иҳалшо ала ҳаргьы уи ауп ҳазҿыз аҵыхәтәантәи ашықәсқәа рзы. Иҟоуп ҳзыхьӡаз, ҳазхьымӡаз, адәныҟатәи афакторқәа ирыхҟьаз, аха ҽнакгьы ҳгу рҭынчны ҳамтәеит. Ирацәан ахҭысқуа, ҳтәылагьы рылахәын ҳакәша-мыкәша ицоз апроцессқәа. Иҳаҧшаауан амҩақәа ҳҳәынҭқарра амчхара зырӷәӷәаша. Ҳарҿагылан политикала, дипломатила, Аҧсынтәыла ҵызшәаауаз амчрақәа.
Аҳәынҭқарра ахада иазгәеиҭеит аҳәынҭқарра амаҵ азызуша апрофессионалтә кадрқәа рыҧшаара шымариамхаз.
«Имариамызт профессионалла иазыҟаҵоу ауаа рыҧшара, аиаша ҳҳәозар, уиаҟара иӷәӷәам ҳкадртә резервқәа, избанзар, аибашьра ашьҭахь урҭ системала разыҟаҵара иахьынӡахәҭоу ахылаҧшра амамызт. Иаалырҟьан аҳәынҭқарратә кадрқәа рцәыргара залшом, ианыҟам иахәҭоу абаза. Ҳаҧхьаҟагьы ари зегь реиҳа иактуалтәу проблеманы ҳҿаҧхьа иқәгылоуп. Аха иҟоу иреиӷьу ҳрышьҭан», - иҳәеит Рауль Ҳаџьымба.
Убри аан иара иазгәеиҭеит аҳәынҭқарраҿ ихадоу аструктурақәа реиқәырхаразы ирылшо зегьы шыҟарҵоз.
«Анс ҳҳәа, арс ҳҳәа, адунеи аҿы имҩаҧысуа акризис, аӡыблара ҳҽамҭақәа алшарақәа ҳаҧшаауан, ҳреспублика аекономикатә лшарақәа реиӷьтәразы, ҳзықәгәыӷуа ҳарратә структурақәа реиқәырхаразы, ҳҳәаақәа рырӷәӷәаразы, анхаҩыжәлар, ишырҳәо еиҧш, рӡы, рымца, рфымца, рымҩа, рыбзазашьа маҷк иаҳзеиӷьтәуазар ҳәа. Аиашаз, избарц зҭаху лабҿаба ибартә иҟоуп ишыҟоу апрогресс, аизҳара. Аха уи иаанагаӡом зегь ҳалҳаршеит ҳәа, зегь ҟаҵоуп ҳәа», - азгәеиҭеит аҳәынҭқарра ахада.
Иҳәеит игәы ишаанаго аҳәынҭқарраҿ аусқәа акырӡа ишыманшәалахо, «иаҳзалыршар аизыразра, аҳәоуеиқәшәара, ахатәы интерес аганаҿ инышьҭаҵаны, аҳәынҭқарратә интерес аҧхьа иҳаргылар».
«Доусу хаҭала илшо ҟаиҵар уи аргылараҿы, хымҧада, инагӡахоит ҳагәҭакы. Убри ахь иҳархароуп амилаҭ рымч, рылша, рхәыцра, рҽазышәарақәа зегьы. Убасҟан ауп ианыҟало аҿиара аизҳара, шәаргьы ҳаргьы ҳазхыццакуа алҵшәақәа», - иҳәеит Ҳаџьымба.
Афото: Аҳәынҭқарра ахада исаит