Маи 22 рзы 88 шықәса дшырҭагылаз иҧсҭазаара далҵит Аҧсны Жәлар рартист, Ахьӡ-аҧша аорден III аҩаӡара занашьоу, Дырмит Гәлиа ипремиа алауреат, акомпозитор Кәасҭа Ченгелиа.
Кәасҭа Ченгелиа 55 шықәса инарзынаҧшуа аҧсуа естрада амаҵ азиухьан. Аҧсны Жәлар рџьынџьтәылатә еибашьраан афронт ацәаҳәаҿы еиҿикаахьаз аконцертқәа рхыҧхьаӡара шәкы иреиҳауп. Усҟан иара иаҧиҵеит 60 инарзынаҧшуа аибашьреи, Аҧсни, апатриотизми, абзиабареи ирызкыз ашәақәа. Аибашьраан ауп ианаҧҵаз Кәасҭа Ченгелиа еицырдыруа иашәақәа «Аиааира», «Аҧҳәызба, ар рымаҭәа зшәу».
Кәасҭа Ченгелиа данхәыҷыз инаркны амузыкахьы азҿлымҳара ааирҧшуан. Зынӡа дышмаҷӡаз аскрипка арҳәашьа иҵеит. Уи раҧхьатәи ишьаҿақәа ракәын, иара даҽакы иҧсҭазаара адиҳәаларцгьы игәы иҭаӡамызт. Аҟазара амузыкатә хырхарҭа иара зыда ҧсыхәа имамыз акәхеит.
Интервиуқәа руак аҿы арҿиаҩы иҳәахьан ишыҟаз аамҭақәак амузыка аницмааиуаз, уи дацәыхароушәа игәы ианарбоз. 1948 шықәса рзы Кәасҭа Ченгелиа дҭалоит ауниверситет, афизика-математикатә факультет, аха 5-тәи акурс анаиркы игәы иҭеикуеит амузыка ахь деиҭахынҳәырц, иагьиӡбоит аконсерваториа дҭаларц. 1970 шықәсазы лҵшәабзиала далгоит Қарҭтәи аконсерваториа. Усҟан ауп ианаҧиҵо раҧхьатәи иашәагьы, уи иахьӡын «Сыбла еиқәара». Кәасҭа Ченгелиа усҟан ихыҵуан 29 шықәса. Акомпозитор иҳәалон, «ари ашәа аҧсҭазаара иаҵоу ахаареи, абзиабара агьамеи ирзыскыз ашәоуп» ҳәа.
1962 шықәсазы еиҿикаауеит ансамбль «Риҵа», уи ашьҭахь иаҧиҵоит Очамчыратәи ансамбль «Ерцахә», уи ааскьанӡа напхгара азиуан. Еиҿикаахьан жәларбжьаратәи азҿлымҳара змаз, абыргцәа рансамбль «Нарҭаа».
Ирацәоуп ансамбль ианаршьахьаз аҧхьахәқәа, урҭ рҭаахьан аҳәынҭқаррақәа жәпакы. 22 ҳәынҭқарра рхаҭарнакцәа злахәны Венгриа имҩаҧысуаз жәларбжьаратәи ашәаҳәаратә фестиваль аҿы «Нарҭаа» иргахьан аиааира. «Аҟазара сыҧҭазаара еиҿызкаауа ак акәны иҟоуп» иҳәон акомпозитор. Иара иқәра инмырҧшӡакәа ҳаамҭа иақәшәо атехнологиақәа рыла аус иуан.
Кәасҭа Ченгелиа иаҧҵамҭа зегьы рҟынтә иаликаауан, аибашьра анцоз ииҩыз «Аҧҳәызба ар рымаҭәа зшәу», «Аиааира» уҳәа ажәлар бзиа ибаны ирҳәо ашәақәа.
«Кәасҭа Ченгелиа еиҧш иҟоу ауаа ианымҵуа ашьҭа аанрыжьуеит акультураҿы, ажәлар рдоуҳатә музыкаҿы. Иара уамашәа зхәыцшьа ыҟаз, зҟазшьа даара иласыз, еснагь аразреи, агәалаҟара бзиеи зҿықәыҳәҳәоз уаҩын. Иахьа шьыжьнаҵы иҳаҳаз ажәабжь даара ҳгәы ҳнархьит. Иаҳдыруан аҵыхәтәантәи аамҭазы агәамбзеира дыхҭанакны дшамаз, аха ҳгәы иаанагомызт ас иаараслны идунеи иҧсахып ҳәа», - иҳәеит Очамчыра араион акультура аҟәша аиҳабы, Аҧсни Аахыҵ Уаҧстәылеи зҽаҧсазтәыз артист Вионор Логәуа.
Вионор Логәуа напхгара аиҭоит Жәлар рышәаҳәареи рыкәашареи рансамбль «Ерцахә», ари ансамбль Кәасҭа Ченгелиа иакәын еиҿызкаахьаз. Иара ахор аҿы ашәа иҳәон аҵыхәтәантәи ашықәсқәа рҟынӡагьы.
«Уажәшьҭа илымшо даналага, зегьы ҳаизиган, иҭабуп ҳәа ҳаиҳәеит. Иҳәеит игәамбзеира иахҟьаны ишиламшо Аҟәантәи мышбжьах мышкы аара, убри аҟынтә ансамбль «Ерцахә» шаанижьуа. Иаанхаз ақәҿиарақәа ҳзеиӷьеишьеит. Кәасҭа Ченгелиа убас дыҟан. Сҭыҧ сара истәуп ҳәа икны дтәаӡомызт. Ҳарҭ абыргцәа уажәшьҭа ҳнаскьаны аҿар амҩа раҳҭароуп ҳәа дхәыцуан», - ҳәа азгәеиҭеит Вионор Логәуа.